ԱՄՆ-ը եւ "Թալիբանը" բանակցում են

ԱՄՆ-ի եւ «Թալիբան» շարժման ներկայացուցիչները բանակցություններ են վարել Գերմանիայի տարածքում` քննարկելով Աֆղանստանի ներքաղաքական խնդիրների կարգավորումը. տեղեկացնում է The Washington Post-ը:

Նշվում է, որ ԱՄՆ նախագահն այս բանակցություններում առաջընթացի մասին կհայտարարի հուլիսին, երբ կքննարկվի Աֆղանստանից ամերիկյան զորքերի դուրսբերման հարցը:

Թալիբների առաջնորդ մոլլա Օմարի մերձավորներից մեկը եւ ԱՄՆ կառավարության ներկայացուցիչն առնվազն երեք անգամ հանդիպել են Գերմանիայում եւ Քաթարում: Այս տեղեկությունը ստանալով` թերթը Աֆղանստանի կառավարությունում իր աղբյուրից տեղեկացել է նաեւ, որ բանակցությունները կազմակերպվել են արաբական եւ եվրոպական մի շարք երկրների կառավարությունների, ինչպես նաեւ ոչ կառավարական կազմակերպությունների միջնորդությամբ:

ԱՄՆ պետդեպարտամենտի ներկայացուցիչն այս տեղեկությունը չի մեկնաբանել` ասելով միայն, որ «ԱՄՆ-ը Աֆղանստանում եւ տարածաշրջանում կապերի լայն ցանց ունի»: Մեկնաբանությունը չի տվել նաեւ գերմանական կողմը: