Սկզբից Ստեփանակերտի եւ Շուշիի աշակերտները

Արգենտինահայ բարերար Էդուարդո Էռնիկյանի նախաձեռնությամբ եւ Հայ բարեգործական ընդհանուր միության աջակցությամբ իրականացվող՝  «Համակարգիչ-յուրաքանչյուր աշակերտին» ծրագիրն Արցախում կմեկնարկի  հաջորդ ուսումնական տարվանից. սկզբում`  Ստեփանակերտի եւ Շուշիի դպրոցների տարրական դասարանների մոտ 3000 աշակերտի փոքր կարգի համակարգիչներ կտրամադրվեն։ Այս մասին «Ազատ Արցախ»-ին տված հարցազրույցում տեղեկացրել է ՀԲԸՄ  ղարաբաղյան ծրագրերի համակարգող Սասուն Բաղդասարյանը։

«Ծրագրի իրականացման համար կառավարությունը դպրոցներում պետք է ապահովի որակյալ կապ, իսկ կրթության եւ գիտության նախարարությունը պետք է հոգա այն մասնագետների գործուղման ծախսերը, որոնք կներգրավվեն շրջանների կադրերի ուսուցման գործընթացում»,-նշել է Սասուն Բաղդասարյանը:

Այժմ  ճշտվում են աշակերտների ցուցակները, աշխատանքներ են տարվում դասասենյակներն անլար համացանցով ապահովելու ուղղությամբ, իսկ դպրոցական արձակուրդների ընթացքում ինֆորմատիկա առարկայի բոլոր ուսուցիչներն ու տարրական դասարանների դասվարները կմասնակցեն երկշաբաթյա դասընթացների։