Բողոքական եկեղեցու անդամը դարձել է տարվա լավագույն գրող

Երեւանի գրողների միությունը 2010թ. լավագույն հեղինակ է ճանաչել «Կյանքի խոսք» կոչվող եկեղեցու անդամ Արթուր Սիմոնյանին, ինչը մեծ դժգոհությունների ալիք է բարձրացրել սոցիալական ցանցերում:

Զրուցելով ԵԳՄ նախագահ Աբգար Ափինյանի հետ` պարզ դարձավ, որ Սիմոնյանը լավագույն հեղինակ է ճանաչվել «Գրական կյանք» պարբերաթերթում տպագրված, մասնավորապես, «Տիտանիկ», «Ով է ապագայի մարդը» եւ «Ծիծաղը հյուրի պես է, ուրախությունը՝ տեղաբնակ» էսսեների համար:

Իսկ թե ինչ սկզբունով են գնահատվել ստեղծագործությունները, Ափինյանը նշեց, որ «այդ թեմաներով միայն ինքն էր գրում», դրա համար էլ նա է արժանացել մրցանակի:

Նշենք, որ «Լավագույն հեղինակ» մրցանակին վերջինս արժանացել է որպես «գրող, հրապարակախոս, հոգեւոր գործիչ Արթուր Սիմոնյան» ներկայացմամբ, ինչ մասին փաստում է հեղինակը` իր բլոգում:

Այս առումով պարոն Ափինյանը նշեց.«Հոգեւոր գործիչ չգիտեմ, բայց էսսեների համար մրցանակ տվել ենք, այո, քանի որ շատ լավ է նա գրում»,-ասաց ԵԳՄ նախագահը: