Օրակարգում երևանաբնակ փախստականների խնդիրներն են

Այսօր Երևանի քաղաքապետ Կարեն Կարապետյանի և ՄԱԿ-ի Փախստականների գծով գերագույն հանձնակատար Դամթյու Դեսալեյնի հանդիպման ժամանակ քննարկվել են մայրաքաղաքում ապաստանած փախստականների խնդիրները. տեղեկացնում է Երևանի քաղաքապետարանի տեղեկատվության և հասարակայնության հետ կապերի վարչությունը:

Ընդգծելով հարցի կարևորությունը` Կարեն Կարապետյանը նշել է, որ ինչպես փախստականների, այնպես էլ սոցիալապես անապահով խավի և վթարային շենքերում բնակվող քաղաքացիների խնդիրները հրատապ են մայրաքաղաքի համար:

Ներկայումս երևանաբնակ  1300 փախստական կա, նրանք ապրում են հանրակացարաններում և դեռևս հաշվառված են բնակարան ստանալու համար:

Քաղաքապետը հյուրին տեղեկացրել է, որ քննարկվում է սոցիալական բնակարանային ֆոնդի ծրագիրը, որով նախատեսվում է արագ և շահավետ պայմաններով լուծումներ առաջարկել կարիքավոր ընտանիքներին:

Կարևորելով քաղաքապետարանի այս քայլը` Դամթյու Դեսալեյնը նշել է, որ խնդիրն առավել նպատակային կլուծվի քաղաքապետարանի և ՄԱԿ-ի Փախստականների հարցերով գերագույն հանձնակատարի գրասենյակի համագործակցության ու համատեղ ծրագրերի իրականացման արդյունքում:

Կողմերը քննարկել են նաև փախստականներին բնակարաններով ապահովելու խնդրի լուծման հետ կապված այլընտանքային մոտեցումները: