Վրաստանը Ռուսաստանի համար այլեւս տարանցիկ երկիր չէ

Վրաստանի խորհրդարանը չի երկարացրել երկրի տարածքով ռուսական ռազմական բեռների ու անձնակազմի տարանցման պայմանագիրը, որը հնարավորություն էր տալիս  Հայաստանում տեղակայված ռազմակայանի համար փոխադրումներ կատարել:

Վրաստանի փոխարտգործնախարար Նինո Կալանդաձեն ասել է, որ այդ պայմանագիրը նորացնելը քաղաքականորեն նպատակահարմար չէ` հիշեցնելով 2008 թվականի օգոստոսյան պատերազմը. տեղեկացնում են վրացական լրատվամիջոցները:

Ի  դեպ, news.am-ի խնդրանքով մեկնաբանելով այդ որոշումը` ՀՀ ՊՆ մամուլի քարտուղար Դավիթ Կարապետյանն ասել է. «Վրաստանի խորհրդարանի որոշումը մեկնաբանելուց զերծ եմ մնում: Ինչ վերաբերում է ռազմական բեռների մատակարարումների աշխարհագրությանը, կցանկանայի նշել, որ այդ որոշումը չի հանգեցնի Հայաստանի անվտանգության միջավայրի փոփոխության եւ որեւէ կերպ չի կարող անդրադառնալ ՀՀ զինված ուժերի մարտունակության վրա»: