Արմավիրում կրակում են

Երեկ` 19.00-ի սահմաններում, Արմավիրի հիվանդանոց է տեղափոխվել 1980 թ. ծնված Կամո Խլղաթյանը՝ Արմավիրի քաղաքապետ Ռուբեն Խլղաթյանի եղբորորդին, որը հայտնել է, թե վնասվածք է ստացել փողոցում վայր ընկնելու հետևանքով:

Սակայն իրականում գլխի շրջանում վնասվածքը Կամո Խլղաթյանն ստացել է Արմավիրի Երեւանյան փողոցում գտնվող «Լեգենդա» բենզալցակայանի մոտ վիճաբանության ժամանակ:

Ինչպես տեղեկացնում են ՀՀ ոստիկանությունից, բենզալցակայանում և հարակից տարածքներում տեղադրված տեսախցիկների տեսագրություններն ուսումնասիրելուց հետո պարզվել է, որ ապրիլի 8-ին` ժամը 18.56-ի սահմաններում, Ջանֆիդա գյուղի բնակիչներ՝ 1984 թ. ծնված Սուրեն Սուքիասյանը, 10-րդ դասարանի աշակերտ Է. Գ.-ն, 1983 թ. ծնված Աշոտ Մանուկյանը, 1984 թ. ծնված Գագիկ Մանուկյանը, 1983 թ. ծնված Արտակ Պապոյանը և դեռևս չպարզված այլ անձինք, ծեծի են ենթարկել Կ. Խլղաթյանին և նրա եղբորը` 1977 թ. ծնված Գոռ Խլղաթյանին:

Ծեծկռտուքի ընթացքում Ս. Սուքիասյանն իր անվամբ գրանցված «Ատմաչա» գազային ատրճանակից երկու անգամ կրակել է:

Սակայն մինչ այդ` ժամը 15:00-ի սահմաններում, Խլղաթյան եղբայրներն էին ծեծի ենթարկել երկու քաղաքացիների, որոնցից մեկը ԱԺ պատգամավոր Ռուստամ Գասպարյանի եղբորորդին է: Իսկ երեկոյան տեղի ունեցած միջադեպը, ըստ էության,  հենց այդ ծեծկռտուքի «հաշվեհարդարն» է եղել:

Այսօր բերման է ենթարկվել Արտակ Պապոյանը: