Կեղծ պրոդյուսերը

Քրիստինե Հովհաննիսյանը` Նարեկ Դուրյանի իրական պրոդյուսերը, ԵՐԿԻՐ-ի հետ զրույցում նշեց, որ իրենք ոչ մի տեղեկություն չունեն` «Սե լա վի» ներկայացման կեղծ տոմսեր վաճառողի մասին:

Նշենք, որ ֆոտոլրագրող Գագիկ Շամշյանը տեղեկացրել էր, թե ոստիկանության Արմավիրի մարզի քննչական բաժնում քրեական գործ է հարուցվել իրեն պրոդյուսեր ներկայացրած եւ մարդկանց կեղծ տոմսեր վաճառած 40-ամյա Դավիթ Գրիգորյանի դեմ` ՀՀ քրեական օրենսգրքի 178 հոդվածի 2-րդ մասի հատկանիշներով (խարդախություն):

Դավիթը մի մանկապարտեզի աշխատակիցների վաճառել էր 18 000 դրամի տոմս,  46 000 դրամի տոմսեր էլ` Արմավիրի մարզի Նոր Ամասիա գյուղի միջնակարգ դպրոցի տնօրեն Գոհարիկ Ներսիսյանին:

Ինչպես տեղեկացրեց Դուրյանի իրական պրոդյուսերը, իրեն մի քանի ամիս առաջ զանգել էին Հոկտեմբերյանից մի քանի տուժած քաղաքացիներ եւ տեղեկացրել, որ իրենց կեղծ տոմսեր են վաճառել:

«Բայց դե մենք ինչ կարող ենք անել, այդ հարցով պետք է ոստիկանությունը զբաղվի: Թող մարդիկ ուշադիր լինեն եւ ինչ-որ մեկի հետ գործարք կնքելուց առաջ ստուգեն փաստաթղթերը»,- ասաց Ք. Հովհաննիսյանը:

Նշենք, որ Նարեկ Դուրյանն այժմ Հայաստանում չէ եւ խնդրին էլ դեռ տեղյակ չէ: