Թուրքերը` ամերիկյան սեւ ցուցակում

Ամերիկյան Մինեսոտա նահանգի շրջանային դատարանը վճռել է օրինական համարել Մինեսոտայի համալսարանի  Հոլոքոստի եւ Ցեղասպանության ուսումնասիրության կենտրոնի կողմից ստեղծված Սեւ ցուցակը (լուսանկարում), որում զետեղված կայքերը ակադեմիական նպատակներով օգտագործման համար վստահելի չեն համարվում:

Դատավորը մերժել է ԱՄՆ Թուրքական կոալիցիայի հայցն ընդդեմ համալսարանի:

Թուրքական կոալիցիայի կայքը եւս ընդգրկված է այդ ցուցակում: Հայցվոր կողմը մեղադրում է համալսարանին իրենց` խոսքի ազատությունը ոտնահարելու համար` որակելով կենտրոնի քայլը որպես զրպարտություն:

Դատավոր Ֆրենկ Դոնավանը հայտարարել է, որ դատարանը վճռել է ճանաչել կրթության հարցում սեփական որոշումներ ընդունելու` համալսարանի իրավունքը:

Համալսարանի ընդհանուր խորհրդի ղեկավար Մարկ Ռոտենբերգը նշել է, որ իրենք անչափ գոհ են նման որոշումից:

ԱՄՆ Թուրքական կոալիցիայի կայքը հայտնվել էր անվստահելի կայքերի ցուցակում Հայոց ցեղասպանության նկատմամբ ունեցած դիրքորոշման պատճառով: Սեւ ցուցակում ընդգրկված բոլոր կայքերի վերաբերյալ համալսարանի ղեկավարությունը նշում է. «Ուսանողները չպետք է օգտագործեն այս կայքերը, քանի որ դրանք ստեղծված են անանուն կազմակերպությունների կողմից, կամ փաստերի եւ կարծիքների տարօրինակ միախառնում են պարունակում»: