Ադրբեջանը պահանջում է փակել Հայկական ԱԷԿ-ը

Ատոմային էներգիայի միջազգային գործակալության` սեպտեմբերի 19-23-ը Վիեննայում անցկացվող գագաթաժողովում Ադրբեջանը դարձյալ հանդես է եկել Հայկական ատոմակայանը փակելու պահանջով:

Ինչպես տեղեկացնում է Regnum-ը, իր ելույթում Ադրբեջանի գիտությունների ակադեմիայի նախագահ Մահմուդ Քերիմովը հայտարարել է, որ Մեծամորի ատոմակայանի գործունեությունը սպառնալիք է ամբողջ տարածաշրջանի համար: «Այդ կապակցությամբ անհրաժեշտ է դադարեցնել կայանի աշխատանքները: Թեեւ  միջազգային փորձագետներն այնտեղ բազմաթիվ հետազոտություններ են իրականացրել, սակայն մոնիտորինգի տվյալները չեն ներկայացվում Հայաստանին սահմանակից երկրներին»- ասել է նա:

Քերիմովը նշել է, որ Թուրքիայի, Ադրբեջանի եւ Վրաստանի կողմից քանիցս առաջարկներ են եղել` միջազգային դիտորդների հետ ուսումնասիրություններ կատարել` ԱԷԿ-ի անվտանգության մասին գաղափար կազմելու համար, սակայն այդ նախաձեռնությանը Հայաստանը եւ միջազգային կառույցները հավանություն չեն տվել: