Թենիսիստները կօգնեն Ճապոնիային

Ինչպես հայտնում է ATP-ի պաշտոնական կայքը, թենիսի աստղերը կանցկացնեն ֆուտբոլային հանդիպում՝ օգնելու համար Ճապոնիայում աղետից տուժած ընտանիքներին։

Ֆուտբոլային հանդիպմանը կմասնակցեն իսպանացիներ Ռաֆայել Նադալը, Դավիդ Ֆերերը, Ֆելիսիանո Լոպեսը և Ֆերնանդո Վերդասկոն, սերբեր Նովակ Ջոկովիչը և Վիկտոր Տրոիցկին, բրիտանացի Էնդի Մարեյը, ճապոնացի Կեյ Նիշիկորին, ֆրանսիացի Ռիշար Գասկեն, ավստրիացի Յուրգեն Մալցերը և Կիպրոսի ներկայացուցիչ Մարկոս Բագդատիսը։

Հանդիպումը տեղի կունենա մարտի 23-ին Մայամիի դպրոցներից մեկում։ Հանդիպումից հետո թենիսիստները կմասնակցեն ընթրիքի և կանցկացնեն աճուրդ։

Նշենք, որ մարտի 21-ից մեկնարկել է Մայամիի «Մաստերսը»՝ Sony Ericsson Open-2011-ը։ Ուժեղագույն թենիսիստները կորտ դուրս կգան երկրորդ փուլից։