Տեղեկատվական անվտանգության մակարդակը բարձրացել է

2010 թվականին Հայաստանում էականորեն բարելավվել է տեղեկատվական անվտանգության մակարդակը: Այդ մասին ասվել է տեղեկատվական անվտանգության հայեցակարգի իրականացումը համակարգող միջգերատեսչական հանձնաժողովի նիստում, որը վարել է հանձնաժողովի նախագահ, Ազգային անվտանգության խորհրդի քարտուղար Արթուր Բաղդասարյանը. տեղեկացնում է ԱԽՔ մամուլի գրասենյակը:

Այս ոլորտում լիազոր մարմին ճանաչված ազգային անվտանգության ծառայությունը 2010 թվականին չեզոքացրել է պետական կառավարման մարմինների պաշտոնական կայքերի վրա կատարված հարձակումները, որոնք շատ տարածված էին 2008-2009 թվականներին: Նիստում որոշվել է ընդլայնել ԱԱԾ վերահսկման տակ գտնվող պետական կառավարման մարմինների պաշտոնական կայքերի ցանկը` ներառելով նաեւ ՀՀ եւ ԼՂՀ մի քանի այլ պաշտոնական կայքեր:

Արթուր Բաղդասարյանը նշել է, որ 2010 թվականին զգալիորեն բարելավվել է նաեւ բազմաշերտ ինտերնետի տարածվածության մակարդակը ո'չ միայն Երեւանում, այլեւ` մարզերում:

Նա կարեւորել է նաեւ տեղեկատվական անվտանգության ոլորտում համագործակցության խորացումը ԵՄ-ի, ՆԱՏՕ-ի, ՀԱՊԿ-ի հետ: Նշված կազմակերպությունների շրջանակներում իրականացվում են կիբերհարձակումները կանխելու համատեղ գործողություններ, օրինակ` Հայաստանն ակտիվորեն մասնակցում է ՀԱՊԿ շրջանակներում իրականացվող «Պրոքսի» միջպետական գործողությանը: Հանձնաժողովի որոշմամբ` անցած տարեվերջին Հայաստանում ներդրվել է նաեւ ոլորտին առնչվող խնդիրների մոնիտորինգի համակարգ:

Հանձնաժողովը քննության է առել ոլորտի զարգացման խոչընդոտները եւ որոշել մշակել դրանց վերացմանն ուղղված գործողությունների ծրագիր: