Տեղն ու ժամանակը սխալ է ընտրել

ԱԺ ՀՀԿ խմբակցության պատգամավոր Հակոբ Հակոբյանը հեռուստատեսությամբ է լսել, որ Րաֆֆի Հովհաննիսյանը որոշել է «ծոմ» պահել, սակայն նրա համոզմամբ` «Ժառանգության» առաջնորդը  կա'մ տեղն է սխալ ընտրել, կա'մ էլ ժամանակը:

Հանրապետական պատգամավորը Րաֆֆի Հովհաննիսյանին այցելել չի պատրաստվում, բայց խորհուրդ է տալիս. «Եթե դա ծոմ է, պաս է, պետք է լինի Էջմիածնում: Եթե դա քաղաքական բողոք է, պետք է լինի պասից հետո»: Նաեւ` «Պասի ժամանակ բոլորն են հացադուլ հայտարարում»:

ՀՅԴ խմբակցության պատգամավոր Արծվիկ Մինասյանն էլ նշեց, որ ինքը դեռ չի այցելել Ազատության հրապարակում հացադուլ անող իր գործընկերոջը, բայց անպայման անցելելու է:

Արծվիկ Մինասյանի  բնորոշմամբ`  Րաֆֆի Հովհաննիսյանի այս քայլն ուժեղ կամքի նշան է, սակայն նա դժվարացավ արդյունավետության տեսանկյունից գնահատել գործընկերոջ այդ քայլը:

«Իշխանությունը պետք է դաս քաղի, որ ՀՀ քաղաքացուն չհասցնի այն վիճակին, որ հացադուլ հայտարարի` անկախ նրանից` այդ մարդը քաղաքական գործիչ է, թե սովորական քաղաքացի»,- ասաց Արծվիկ Մինասյանը: