Ժակ Շիրակը կանգնելու է դատարանի առջեւ

Այսօր Փարիզում սկսվելու է Ֆրանսիայի նախկին նախագահ Ժակ Շիրակի դատավարությունը, որին մեղադրում են Փարիզի քաղաքապետ լինելու տարիներին իր կուսակիցների համար կեղծ աշխատատեղեր բացելու մեջ:

Մեղադրողը պնդում է, որ դրա նպատակը եղել է նախագահական ընտրություններին «պատշաճ» պատրաստվելը, նաեւ այդպիսով Շիրակն իր կուսակցությանը պետբյուջեից լրացուցիչ միջոցներ է հատկացրել:

78-ամյա նախկին նախագահը, որն անձեռնմխելիությունից զրկվել է 2007-ին պաշտոնաթող լինելուց հետո, կտրականապես հերքում է իրենց ներկայացված մեղադրանքները. տեղեկացնում է France 24-ը:

Փաստաբանի խնդրանքով Շիրակն առաջին օրը ներկա չի լինի դատարանում, սակայն երկրորդ օրը կներկայանա` ցուցմունքներ տալու համար:

Նման իրավախախտումների համար, ըստ գործող օրենքի, նախատեսվում է մինչեւ 10 տարվա ազատազրկում եւ 150 հազար եվրոյի տուգանք: