Ֆերգյուսոնը սրտի ուզածի չափ արտահայտվել է

Անգլիայի ֆուտբոլի ասոցիացիան դիմել է «Մանչեսթեր Յունայթեդին»` խնդրելով ներկայացնել Ալեքս սըր Ֆերգյուսոնի` MUTV հեռուստաընկերությանը տված հարցազրույցի կրկնօրինակը: Հարցազրույցը տեղի է ունեցել երեքշաբթի օրը` «Չելսիի» հետ հանդիպումից հետո: Այժմ մարզչին կարգապահական պատիժ է սպառնում հանդիպման մրցավար Մարտին Ատկինսոնի հասցեին արած մեկնաբանությունների համար:

Հիշեցնենք, որ Ֆերգյուսոնը քննադատել էր մրցավարին մի շարք որոշումների համար, որոնք, շոտլանդացու կարծիքով, փոխել էին խաղի ընթացքը և հանգեցրել «Մանչեսթեր Յունայթեդի» պարտությանը: Ֆերգյուսոնը դեռ պետք է երկու հանդիպում բաց թողնի, քանի որ նախորդ մրցաշրջանում չորս խաղով որակազրկվել էր Ալան Ուայլիի հասցեին շատ սուր արտահայտվելու համար: Եթե այս անգամ էլ պատժվի, ապա նրան սպառնում է երկարաժամկետ որակազրկում:

Կներկայացվե՞ն նրան նման մեղադրանքներ` պարզ կլինի ուրբաթ երեկոյան, բայց եթե նույնիսկ դա տեղի ունենա, հաշվի առնելով ոչ սովորական հանգամանքները, այդ որոշումն անմիջապես ուժի մեջ չի մտնի, և Ֆերգյուսոնը կկարողանա ղեկավարել «Յունայթեդը» կիրակի օրը «Լիվերպուլի» հետ կայանալիք հանդիպման ժամանակ: