Մարտի 8-ն առանց նվերի

ՀՀ կրթության եւ գիտության նախարարությունում կայացել է խորհրդակցություն, որի ընթացքում նախարար Արմեն Աշոտյանը բանավոր հանձնարարական է տվել հանրակրթության վարչությանը` կապված մարտի 8-ի եւ ապրիլի 7-ի առաջիկա տոնական միջոցառումների հետ:

Նախարարը նշել է, որ այս տարի եւս պետք է ձեռնարկել բոլոր անհրաժեշտ միջոցները, որպեսզի դպրոցներում բացառվի ուսուցչի հեղինակությունն արատավորող որևէ դրսևորում:

«Անհրաժեշտ է, որպեսզի դպրոցի տնօրինությունն ակտիվ բացատրական աշխատանք ծավալի ծնողական խորհուրդների հետ` դրամահավաքության նախաձեռնությունները կանխելու նպատակով»,- ընդգծել է նախարարը:

Նա հանձնարարել է ԿԳՆ հանրակրթության վարչությանը հանձնարարականի մասին տեղեկացնել ուսումնական բոլոր հաստատություններին:

ԿԳՆ հասարակայնության հետ կապերի վարչության պետ Արթուր Բաղդասարյանի խոսքերով` եթե, այնուամենայնիվ, դպրոցներում դրամահավաքներ լինեն, կձեռնարկվեն համապատասխան քայլեր: