Որ գյուղացին չխռովի հողից

Հայրենական արտադրողների միության նախագահ Վազգեն Սաֆարյանն ու ԱԺ սոցիալական հարցերի մշտական հանձնաժողովի նախագահ Հակոբ Հակոբյանն այսօր լրագրողներին ներկայացրել են գնաճի դեմ պայքարելու իրենց մոտեցումները:

Վազգեն Սաֆարյանի կարծիքով` գնաճը զսպելու լավագույն մեխանիզմներից մեկը տեղական արտադրության ծավալները մեծացնելն է:

«Գյուղացին այսօր կարծես խռովել է հողից ու չի մշակում այն, անասուններին մթերում է որպես մսացու: Մենք պետք է խթանենք գյուղատնտեսությունը: Առաջարկում եմ ջուրը գյուղացուն ձրի տալ»,- ասաց նա` հավելելով, որ կառավարությունը կարող է մեղմել գնաճը նաեւ ճիշտ տարվող մաքսային քաղաքականության միջոցով:

«Մենք պետք է կարգավորենք նաեւ մթերման շուկան. եթե պահեստավորեինք ու դեֆիցիտի պարագայում դուրս բերեինք շուկա, այս պատկերը չէինք ունենա»,- հավելեց Վ. Սաֆարյանը:

Հ. Հակոբյանի խոսքերով` խաթարված է պետություն-քաղաքացի ուղիղ վարկավորման ճանապարհը: Գյուղատնտեսությունը խթանելու ճանապարհներից մեկը, ըստ պատգամավորի, գյուղացուն էժան վարկային ռեսուրսներ տրամադրելն է:

«Երբ բերքը շատ է, տուժում է գյուղացին, քանի որ էժան է վաճառում, իսկ երբ քիչ է, տուժում է ամբողջ հասարակությունը: Արտադրության բազան մեծացնելով` պետք է ավելացնենք սպառողական բազան, նաեւ արտահանման խնդիր լուծենք»,- նշեց պատգամավորը: