ՄԱԿ-ը Լիբիայի հարցով արտակարգ նիստ է հրավիրել

ՄԱԿ-ի Անվտանգության խորհուրդն այսօր հատուկ նիստ է անցկացնելու, որի ընթացքում քննարկվելու են Լիբիայում տեղի ունեցող իրադարձությունները:

ՄԱԿ-ի գլխավոր քարտուղար Պան Գի Մունը հայտարարել է, որ խորհրդակցությունն անցնելու է փակ դռների հետեւում, եւ ԶԼՄ ներկայացուցիչները եւս ներկա չեն լինելու:

Փետրվարի 21-ին Պան Գի Մունը դատապարտել էր ռազմաօդային ուժերի կողմից լիբիացի ցուցարարների ռմբակոծումը: Ըստ որոշ տեղեկությունների` նա հեռախոսազրույց էր ունեցել Լիբիայի առաջնորդ Մուամար Քադաֆիի հետ եւ խնդրել է նրան` վերջ տալ բռնությանը:

Նաեւ հայտնի է դարձել, որ 70 իրավապաշտապան կազմակերպություններ բողոք-դիմում են ներկայացրել, որում պահանջում են Քադաֆիի անհապաղ հրաժարականը: