Տեր լինենք մեր ընտրական իրավունքին

Այսօր մեկնարկեց ՀՅ Դաշնակցության նախաձեռնած Ընտրական իրավունքի պաշտպանության շարժման առաջին միջոցառումը: Ինչպես միջոցառման սկզբում հայտարարեց ԱԺ ՀՅԴ խմբակցության քարտուղար Արտաշես Շահբազյանը, միջոցառման օրը` փետրվարի 18-ը, համընկել է Փետրվարյան ապստամբության տարելիցի հետ, սակայն «զուգահեռներն ուղղակի ընդունել պետք չէ»:

ՀՅԴ նախաձեռնությանը միացել են նաեւ մի շարք հասարակական կազմակերպություններ, իսկ միջոցառմանը ներկա էին ներկայացուցիչներ ՀՌԱԿ, «Ժառանգություն», «Նոր ժամանակներ» կուսակցություններից:

ՀՅԴ Բյուրոյի ներկայացուցիչ Հրանտ Մարգարյանը համոզված է, որ շարժումն  այս իրավիճակից դուրս գալու միակ ելքն է, որովհետեւ հենվում է այն փաստի վրա, որ յուրաքանչյուր քաղաքացի պետք է դերակատարություն ունենա երկրում: «Եթե ուզում ենք մեր կյանքը փոխվի, վիճակը փոխվի` մենք տեր պետք է լինենք մեր ընտրական իրավունքին, մեր քվեն չպետք է ծախենք 5000 դրամով, չպետք է մեր համոզմանը դեմ քվեարկենք»,- ասաց Հրանտ Մարգարյանը: