Թուրքական խայծ` հանդիպումից առաջ

Հայաստանյան էլեկտրոնային լրատվամիջոցները, մեծ ջանասիրությամբ հղում անելով թուրքական աղբյուրներին, գրում են, որ  Թուրքիայի ազգային հետախուզության (MIT) ղեկավար Հաքան Ֆիդանը Ադրբեջանում հանդիպումներ է ունեցել այդ երկրի նախագահի և ազգային անվտանգության նախարարի հետ: Ըստ թուրքական Takvim («Թաքվիմ») օրաթերթի` Անկարան Ֆիդանին գործուղել է Բաքու՝ հայ-թուրքական գործընթացի առնչությամբ առաջացած լարվածությունը հարթելու համար։

«Հանդիպումների ընթացքում Ֆիդանն Ալիևին է փոխանցել Թուրքիայի նախագահ Աբդուլլահ Գյուլի և վարչապետ Ռեջեփ Թայիփ Էրդողանի ուղերձները։ Բացի այդ` Ֆիդանը շատ կարևոր տեղեկություններով ու փաստաթղթերով սիրաշահել է Ադրբեջանի իշխանություններին՝ Հայաստանի և Թուրքիայի միջև հարաբերությունների կարգավորման գործընթացի պատճառով թուրք-ադրբեջանական հարաբերություններում առաջացած լարվածությունը պարպելու համար»,- գրում է Takvim–ը։

Ըստ թուրքական պարբերականի` Հաքան Ֆիդանը Բաքվում քննարկել է նաև Ղարաբաղյան հիմնախնդիրը։

«Ֆիդանը հանդիպումների ընթացքում հայտարարել է նաև, որ հայ-ադրբեջանական պատերազմը վտանգելու է թե' տարածաշրջանով էներգակիրների տարանցումը, թե' տարածաշրջանային կայունության համար կենսական նշանակություն ունեցող ռուս-թուրքական համագործակցությունը»,– վկայակոչելով թուրքական լրատվամիջոցները` գրում են մեր էլեկտրոնային պարբերականները` մոռանալով նշել, որ Թուրքիայի ազգային հետախուզությունն այն կառույցներից է, որը երբեք հենց այնպես մամուլի համար տեղեկատվության արտահոսք չի անում:

Կարելի է ենթադրել, որ այս արտահոսքը խայծ-ուղերձ է Հայաստանի իշխանություններին` Թուրքիայի նախագահի բանագնացի` Հայաստան այցելությունից առաջ: