ՀՐԱՊԱՐԱԿ.Դալլաքյանը մինուճա՞ր է

Երեկ մամուլում հրապարակումներ եղան, թե ԱԺ պատգամավոր Վիկտոր Դալլաքյանի եղբայրը` Սամվել Դալլաքյանը, մտել է ՕԵԿ: Սա եղել է եղբոր պահանջով. հայտնի է, որ Վիկտոր Դալլաքյանը վաղուց ի վեր ենթարկվում է  նախագահականից եկող հրահանգներին:

Հարցի առնչությամբ մեր թղթակիցը փորձել է մեկնաբանություն լսել Դալլաքյանից: Վերջինս, իբր կատակելով, ասել է. «Կարեկցելով իմ անձով կոմպլեքսավորված, լուրիկներ պատվիրող սակավամիտներին` տեղեկացնում, որ քույր կամ եղբայր չունեմ: Այսօրինակ հրապարակումներից հետո վերստին համոզվում եմ, որ հիմարությունն անբուժելի հիվանդություն է, որն արժանի է միմիայն խղճահարության»:

ՕԵԿ մամուլի պատասխանատուի հետ խոսելուց հետո մենք սկսեցինք ենթադրել, որ գուցե Դալլաքյանին հայտնի չէ իր եղբոր գոյությունը, քանի որ  ՕԵԿ-ի մամուլի քարտուղար Սուսաննա Աբրահամյանը պաշտոնապես հաստատեց Վիկտոր Դալլաքյանի եղբոր` իրենց կուսակցությանն անդամագրվելու փաստը:

Երբ ձեռնտու է` հայտարարում է, որ եղբայր չունի, իսկ եղբորն էլ ասում է` կատակ եմ արել: Ի դեպ, մոտ մեկ ամիս առաջ ՕԵԿ անդամ դարձավ նաեւ Աջափնյակի նախկին թաղապետ Արծրուն Խաչատրյանը (Ծիվո), որին ընտրություններում հաղթեց գլխավոր դատախազի եղբայրը: