Թերթ` iPad-ի համար

News Corp մեդիակորպորացիան եւ Apple ընկերությունը թողարկել են iPad համակարգչի համար հատուկ նախատեսված The Daily էլեկտրոնային թերթը: Մոտ 30 մլն դոլար արժողությամբ նախագծին մասնակցել է 100 մարդ:

Թերթի շաբաթական բաժանորդագրությունը 99 ցենտ է: Թարմ համարը iPad-ի տերը ստանում է ավտոմատ կերպով:

Էլեկտրոնային թերթի ընթերցողներին կներկայացվեն հոդվածներ, լուսանկարներ (նաեւ համայնապատկերային), տեսաերիզներ:

Նախաձեռնությունը News Corp-ի` օնլայն հրատարակությունները վճարովի դարձնելու ռազմավարության շարունակությունն է: Անցյալ տարվա հունիսին մեդիակորպորացիան փակել էր մուտքը բրիտանական The Times եւ The Sunday Times թերթերի ինտերնետային տարբերակներ:

Կորպորացիայի օրինակին այս տարի հետեւելու է նաեւ The New York Times-ը: Ընդ որում` թերթի թղթային տարբերակի բաժանորդների համար ինտերնետային տարբերակ մուտքը կլինի անվճար:

Տեղեկացնենք նաեւ, որ iSuppli վերլուծական ընկերության կանխատեսումներով` 2011-ին կվաճառվի 43,7 մլն iPad: