Միքայել Հասրաթյանը Երեւանի գլխավոր ճարտարապե՞տ

Երեկ  աշխատանքից ազատվել է Երեւանի գլխավոր ճարտարապետ Սամվել Դանիելյանը: Ըստ  քաղաքապետի մամլո խոսնակ Շուշան Սարդարյանի, Երեւանի գլխավոր ճարտարապետը աշխատանքից ազատվել է իր դիմումի համաձայն:

Այն հարցին, թե ո՞վ կփոխարինի վերջինիս, խոսնակն ասաց. «Դա իրավական ընթացակարգ է ենթադրում եւ բխում է «Համայնքային ծառայության մասին» օրենքի պահանջներից, այսինքն` քանի որ գլխավոր ճարտարապետի պաշտոնը համայնքային ծառայողի պաշտոն է, ապա ժամանակավոր թափուր պաշտոն առաջանալու դեպքում, նույն օրենքի համաձայն, այդ պաշտոնը կարող է զբաղեցնել համայնքային ծառայության կադրերի ռեզերվում գտնվող եւ համապատասխան պահանջները բավարարող անձը: Եվ քանի որ կադրերի  այս ռեզերվը վարում է ՀՀ տարածքային կառավարման նախարարությունը, ապա քաղաքապետարանը դիմել է վերջինիս»:

Մեզ հասած տեղեկություններով, մոտ օրերս  գլխավոր ճարտարապետ  կնշանակվի Միքայել Հասրաթյանը: Նա  1962-1975թթ. Երեւանի քաղաքային խորհրդի նախագահ Գրիգոր Հասրաթյանի թոռն է: