2011-ին ծնված երեխաներին տրվել են անվճար բուժօգնության հավաստագրեր

2011թ. հունվարի 1-ից 0-7 տարեկան բոլոր երեխաներն իրավունք կունենան անվճար բուժօգնություն ստանալ հանրապետության ցանկացած բուժհաստատությունում: Այդ նպատակով առողջապահության նախարարության կողմից երեխաներին կտրամադվեն առողջության պետական հավաստագրեր: Հիշյալ տարիքային խմբի երեխաների բուժումը բացարձակապես անվճար կլինի, բացառությամբ այն դեպքերի, երբ կկիրառվեն թանկարժեք սարքավորումներով հետազոտություններ:

Ինչպես ԵՐԿԻՐ-ի հետ զրույցում նշեց ՀՀ առողջապահության նախարարի մամուլի խոսնակ Շուշան Հունանյանը, այս տարվա բոլոր նորածիններն արդեն ստացել են անվճար բուժօգնության հավաստագրերը: «Կարող եմ վստահեցնել, որ այս տարի ծննդատներից դուրս գրված յուրաքանչյուր երեխայի հատկացվել է անվճար բուժօգնության հավաստագիր: Հանրապետության բոլոր հիվանդանոցները տրամադրում են այդ հավաստագրերը»,-մեզ հետ հեռախոսազրույցում նշեց Շ.Հունանյանը:

Նշենք, որ «Երեխայի առողջության պետական հավաստագիր» ծրագրի ներդրման համար 2011 թ. բյուջեից կտրամադրվի 3,13 մլրդ դրամ: