ՀԱՅԿԱԿԱՆ ԺԱՄԱՆԱԿ. Մինչեւ փետրվար

Ինչպես փոխանցում են իշխանական մեր աղբյուրները, Գագիկ Ծառուկյանի ղեկավարած «Բարգավաճ Հայաստան» կուսակցության` կոալիցիայից դուրս գալու փաստը դեռ փակված չէ եւ շարունակում է մնալ ներիշխանական օրակարգի թիվ մեկ խնդիրը:

Նույն աղբյուրները նշում են, որ կոալիցիան քանդվելու վտանգը կա մինչեւ փետրվար: Թե ինչու է այդ ամիսը նշվում, գոնե այս պահին դեռ անհասկանալի է: Ըստ մեր աղբյուրների, Ծառուկյանն ու նրա կուսակիցները ցանկանում են, որ արտահերթ ընտրություններ տեղի ունենան: Հաշվարկը հետեւյալն է` ԲՀԿ-ն վայր է դնում նախարարական պորտֆելներն ու մյուս պաշտոնները, ինչպես նաեւ մանդատները, իսկ Սերժ Սարգսյանը ստիպված է լինում ցրել խորհրդարանը: Նշենք, որ սույն տեղեկությունները մենք ստացել ենք Սերժ Սարգսյանի մերձավոր շրջապատից: Ըստ նույն աղբյուրների, Սարգսյանը ԲՀԿ-ի համար առաջիկա ընտրություններում նախատեսում է այն նույն դերակատարությունը, որը ստանձնեց ՕԵԿ-ը նախորդ ընտրություններում: Այդ դերը, սակայն, Ծառուկյանին այնքան էլ դուր չի գալիս: