Առգրավվել է 72 կգ եւ 534 գրամ թմրանյութ

Այս տարվա ընթացքում հայտնաբերվել եւ առգրավվել են 72 կիլոգրամ եւ 534 գրամ տարբեր տեսակի թմրամիջոցներ:  Այս մասին լրագրողների հետ հանդիպման ժամանակ ասաց ՀՀ ոստիկանապետի տեղակալ, գեներալ-մայոր Հունան Պողոսյանը:

Նա նշեց, որ Հայաստան ներկրվող թմրանյութերի հիմնական մասը մաքսանենգ ճանապարհով բերվում է Իրանից, ավելի քիչ չափով Ռուսաստանից եւ եվրոպական երկրներից:

Փոխոստիկանապետի խոսքերով` վերջին շրջանում արձանագրված դեպքերի վերլուծությունները ցույց են տալիս, որ որոշ դեպքերում մեր երկիրը տարանցիկ ուղի է դառնում հանցագործների համար:

Այս դեպքերում ՀՀ ոստիկանությունը համագործակցում է այլ երկրների ոստիկանության աշխատակիցների հետ: Օրինակ, մոտ մեկ ամիս առաջ իրենց իտալացի գործընկերներից տեղեկություն են ստացել, թե Իրանից Հայաստան է ներկրվելու թմրանյութի բավականին մեծ խմբաքանակ, որն այնուհետեւ տեղափոխվելու է Ռուսաստան, այնտեղից էլ Իտալիա:

Հայ ոստիկանները կարողացել են հայտնաբերել եւ առգրավվել այդ խմբաքանակը, որը պահված է եղել ճամպրուկում նախապես պատրաստված գաղտնարանում, եւ հատուկ վարժեցրած շները չէին կարողանում հայտնաբերել այն: