Շախմատ են խաղում երիտասարդ առաջնորդները

«Երբ ուժը մտածում է» կարգախոսն ունեցող Երիտասարդ առաջնորդների դպրոցի (ԵԱԴ) անդամներն ու ուսանողները շախմատի առաջնության ժամանակ պարզելու են, թե ով է իրենց միջի ամենամտածողը:

Մրցույթը, որին մասնակցում է երեսունից ավելի երիտասարդ առաջնորդ, տեղի է ունենալու նոյեմբերի 28-ին` Շախմատի տանը: Հաղթողը եւ լավագույն հանդես եկած մասնակիցները ստանալու են պատվոգրեր եւ մրցանակներ:

«Այս մրցույթը ավանդական է դառնալու: Այն կանցկացվի երեք ամիսը մեկ անգամ: Կձեւավորվի ԵԱԴ շախմատային թիմը, որն էլ կմասնակցի Հայաստանում անցկացվող սիրողական մրցույթներին»,- ասաց ԵԱԴ սպորտային ակումբի համահիմնադիր եւ մրցույթի կազմակերպիչներից Մհեր Սահակյանը:

ԵԱԴ սպորտային ակումբը հիմնադրվել է չորս ամիս առաջ և նպատակ ունի առողջ ապրելակերպի գաղափարը տարածել երիտասարդության շրջանում: Ակումբն իր գործը սկսել է ֆուտբոլային խաղեր կազմակերպելուց:

Ակումբի համահիմնադիր Համլետ Թադեւոսյանն ասաց, որ այժմ ԵԱԴ-ն ունի իր ֆուտբոլային թիմը, որը հանդիպումներ է ունենում նաև հայաստանյան այլ սիրողական թիմերի հետ. «Ամեն շաբաթ խաղում ենք: Այս ամենի շնորհիվ` շատերը սկսել են սիրել ու զբաղվել սպորտով»: