Ընդդիմադիր պատգամավորները միջազգային գործընկերներին ներկայացրել են Հայաստանի ներքաղաքական իրավիճակը

Ողջունում ենք Ձեր այցելությունը Հայաստան՝ հատկապես սպասվող խորհրդարանական ընտրություններից առաջ: Արժեւորում ենք անկախ դիտորդների ներգրավվածությունն ընտրական գործընթացներում, ինչպես նաեւ նախաձեռնության գործունեությունը՝ որպես ոչ պաշտոնական եւ ապակուսակցական հարթակ: Այս մասին ասել է ՀՀ ԱԺ «Հայաստան» խմբակցության ղեկավար Սեյրան Օհանյանը «Հայաստանում ժողովրդավարության միջազգային դիտարան» նախաձեռնության ներկայացուցիչների հետ հանդիպման ընթացքում: Այս մասին տեղեկանում ենք ԱԺ-ից։

Հանդիպումը տեղի է ունեցել մարտի 11-ին, որին մասնակցել են խմբակցության պատգամավորներ Աննա Գրիգորյանը եւ Արթուր Խաչատրյանը:

«Մենք մարդու իրավունքների պաշտպանության հարցերով զբաղվող անկախ փորձագետների խումբ ենք: Հայաստանում ենք՝ հասկանալու այն բոլոր մարտահրավերները, որոնք կարող են խոչընդոտել ազատ ու անկախ ընտրությունների անցկացումը»,- ասել է իրավապաշտպան, Human Rights Watch-ի նախկին գործադիր տնօրեն Քենեթ Ռոթը:

Նախաձեռնության անդամները նշել են, որ իրենց առաքելության նպատակն է գնահատել երկրի ժողովրդավարական վիճակը՝ 2026 թվականի հունիսի 7-ին կայանալիք ՀՀ Ազգային ժողովի ընտրություններին ընդառաջ:

Խմբակցության պատգամավորները պատասխանել են հյուրերի հարցերին՝ անդրադառնալով Հայաստանի ներքաղաքական իրավիճակին, առկա մարտահրավերներին, ինչպես նաեւ ազատ ու անկախ ընտրությունների անցկացումը վտանգող հնարավոր խոչընդոտներին: