Վարդան Ղուկասյանը ծանր և վտանգավոր առողջական վիճակում էր. պաշտպանն ահազանգում է

Գյումրու քաղաքապետ Վարդան Ղուկասյանի պաշտպան Զարուհի Փոստանջյանն ահազանգում  է «Երևան-Կենտրոն» ՔԿՀ-ում ստեղծված ծայրահեղ մտահոգիչ իրավիճակի մասին։

«Ես բավականին երկար ժամանակ գտնվել եմ քրեակատարողական հիմնարկի մուտքի մոտ, սակայն հիմնարկի աշխատակազմը, խախտելով իմ օրինական լիազորությունները, հրաժարվում է ինձ թույլ տալ մուտք գործել և հանդիպել իմ պաշտպանյալին։ Ավելի վաղ ես արդեն տեսակցել էի Վարդան Ղուկասյանին։ Նա ծանր և վտանգավոր առողջական վիճակում էր։ Ես լրջագույն մտահոգություն ունեմ նրա կյանքի, առողջության և ֆիզիկական անվտանգության համար։ Ինձ տեղեկացրել են, որ նրա խցում նոր անձինք են տեղավորել։

Մինչդեռ քրեակատարողական հիմնարկի ղեկավար պարոն Թամարյանը, արդարադատության նախարար տիկին Գալյանը, ինչպես նաև այլ պաշտոնատար անձինք հրաժարվում են որևէ տեղեկատվություն տրամադրել Վարդան Ղուկասյանի պահման պայմանների, այդ թվում՝ նրա խցում պահվող անձանց մասին։ Նույն կերպ Անահիտ Ավանեսյանը և Կամո Մանուկյանը հրաժարվում են տրամադրել որևէ բժշկական փաստաթուղթ կամ տեղեկատվություն՝ հղում անելով այսպես կոչված «բժշկական գաղտնիքին»։ 2025 թվականի նոյեմբերի 8-ից ի վեր՝ ՀՀ իշխանությունները ապօրինաբար չեն թույլատրում անկախ բժիշկներին զննել Վարդան Ղուկասյանին՝ չնայած նրա կյանքին սպառնացող առողջական վտանգներին»,-նշումէ  նա։ 

Պաշտպանը հրապարակային կերպով հրատապ պահանջ է ներկայացրել գլխավոր դատախազին՝ անհապաղ ապահովելոը  իր անսահմանափակ մուտքը Վարդան Ղուկասյանի մոտ։