Ճամբարակի գազի պայթյունի հետևանքով չորրորդ զոհը 60 տարեկան տղամարդ է. Կամո Ցուցուլյան

Ճամբարակի գազի պայթյունից փլուզված շենքի փլատակներից դուրս բերված չորրորդ զոհը մոտ 60 տարեկան տղամարդ է։ Այս մասին լրատվամիջոցներին հայտնել է ՆԳՆ փրկարար ծառայության տնօրեն Կամո Ցուցուլյանը։

Թեև նախնական տվյալներով փրկարարները փնտրում էին մայր և որդի, Ցուցուլյանի խոսքով՝ այս պահին որոնվում է ևս մեկ անհետ կորած, որը նույնպես տղամարդ է։ Տեղում աշխատող լրագրողներին տարածքի բնակիչները հայտնել են, որ որոնվողը հնարավոր է՝ տեղի թատրոնի տնօրեն Արթուր Սարգսյանն է, սակայն փրկարար ծառայության պետը հրաժարվել է հաստատել այդ տեղեկությունը՝ նշելով միայն, որ որոնվողը տղամարդ է։

Ըստ Ցուցուլյանի՝ փրկարարական աշխատանքները իրականացվում են հերթափոխով։ Այս պահին փրկարարների մի մասը սպասում է կինոլոգների (շների հետ աշխատող մասնագետների) աշխատանքների ավարտին՝ որոնվողի հնարավոր գտնվելու վայրը ավելի ճշգրիտ պարզելու նպատակով։

Կամո Ցուցուլյանը նաև հայտնել է, որ քաղաքաշինության կոմիտեն և սեյսմիկ ծառայությունը գնահատել են շենքի չփլուզված հատվածի վիճակը։ Վերջնական որոշումը՝ այն վերանորոգել թե քանդել, կընդունվի համապատասխան եզրակացությունից հետո։

Ավելի վաղ տեղեկացրել էինք, որ հունիսի 11-ին, ժամը 08։34-ին Գեղարքունիքի մարզային փրկարարական վարչության ճգնաժամային կառավարման կենտրոն ահազանգ է ստացվել, որ Ճամբարակ քաղաքի Գարեգին Նժդեհի փողոցի շենքերից մեկի բնակարաններից մեկում հրդեհ է բռնկվել։ Պայթյունի հետևանքով կա 4 զոհ։