Պուտինը կողմ է, որ Ուկրաինայի հետ շփումները շարունակվեն. Պեսկով

ՌԴ նախագահ Վլադիմիր Պուտինը կողմ է, որ ուկրաինական կողմի հետ շփումները շարունակվեն։ Այս հայտարարությունն արել է ՌԴ նախագահի մամուլի քարտուղար Դմիտրի Պեսկովը։

«Տեղյակ եք, որ երեկվա խորհրդակցության ժամանակ մեր արտգործնախարար Սերգեյ Լավրովն ասաց, որ անհրաժեշտ է շարունակել շփումներն աշխատանքային մակարդակով։ Պետության ղեկավարը կողմ է այս տեսակետին», - ասել է նա՝ պատասխանելով այն հարցին, թե արդյոք Կրեմլը հնարավոր համարում է Ուկրաինայի հետ շփումների դադարեցումը, եթե Կիևը կրկին հարվածի քաղաքացիական օբյեկտներին։

Պեսկովն ընդգծել է, որ հենց Կիևի հրահանգով է գնացք պայթեցվել Բրյանսկի մարզում։

«Հենց Կիևի ռեժիմի ղեկավարությունն է գիտակցված հրահանգ տվել, որ ուղևորատար գնացք պայթեցվի։ Սա ոչ այլ ինչ է, քան ահաբեկչություն պետական մակարդակով», - ասել է ՌԴ նախագահի մամուլի քարտուղարը։

Նա նշել է` ՌԴ-ն ապագայում հաշվի կառնի այն փաստը, որ Կիևի ռեժիմը ձեռք է բերել ահաբեկչական ռեժիմի բոլոր հատկանիշները։