Հերթական զավեշտը ագրարայինում. բույսերի պաշտպանության միջոցներն ու գինին անթույլատրելի հեռավորության վրա

Ագրարային համալսարանում այսօր նշվել է Բույսերի պաշտպանի օրը: 

Ըստ Էկոնոմիկայի նախարարության տարածած հաղորդագրության` նախարարի տեղակալ Տաթևիկ Սարգսյանը ՀԱԱՀ ռեկտոր Հրաչյա Զաքոյանի ուղեկցությամբ նաև շրջել է համալսարանի շքասրահում, ծանոթացել ներկրող կազմակերպությունների կողմից ներկայացված բույսերի պաշտպանության միջոցների լայն տեսականուն։

Տարածված լուսանկարներից Yerkir.am-ը նկատեց, որ բույսերի պաշտպանության միջոցներից ընդամենը 2-3 մետր հեռավորության վրա կազմակերպվել է սննդի և գինու հյուրասիրություն:

Էկոնոմիկայի փոխնախարարն ու համալսարանի ռեկտորը առնվազն պետք է տեղյակ լինեին, որ գոյություն ունի հանրապետության առողջապահության նախարարի հրաման, որով սննդի ընդունումը նախատեսվում է այդ միջոցներից անվտանգ հեռավորության վրա:

Թերևս, ագրարայինի Բույսերի պաշտպանություն մասնագիտության 1-2 ուսանողները տեսնելով այս ամենը, համալսարանում պետք է սովորեն ինչ կարելի է չանել:

Հույս ունենք, որ լուսանկարում գավաթների մեջ կարմրավուն հեղուկը գինի է, և ոչ թե բույսերի պաշտպանության միջոց: