Կրակոցներ Սպիտակ տան մոտ. կա վիրավոր

ԱՄՆ Գաղտնի ծառայության աշխատակիցները Վաշինգտոնում Սպիտակ տան մոտ կրակ են բացել զինված տղամարդու վրա, հայտնել է գործակալության մամուլի քարտուղար Էնթոնի Գուլիելմին X-ի իր էջում:

NBC News-ի փոխանցմամբ՝ դեպքը տեղի է ունեցել մարտի 9-ի գիշերը։ Տեղի ոստիկանությունը փնտրում էր «ինքնասպանության հակված անձի», որը, ենթադրաբար, մայրաքաղաք էր եկել Ինդիանայից:

Գաղտնի ծառայության գործակալները ոտքով քայլելիս նկատել են նկարագրությանը համապատասխանող տղամարդուն, ավելի ուշ գտել նրա մեքենան: Երբ ուժայինները մոտեցել են տղամարդուն, նա հանել է հրազենը և սկսվել է զինված փոխհրաձգություն։

Կասկածյալը վիրավորվել է ու հոսպիտալացվել, սակայն նրա վիճակը չի հաղորդվում։ Գաղտնի ծառայության աշխատակիցներ չեն տուժել։ Իրավապահները հետաքննում են միջադեպը։