ՌԴ Ալթայի երկրամասի շրջաններից մեկի ղեկավարը սպանվել է սրճարանից դուրս գալու պահին

Ալթայի շրջանի Զավյալովսկի շրջանի ղեկավար Նիկոլայ Օնիշչենկոն սպանվել է սրճարանից դուրս գալու պահին։ Հարուցվել է քրեական գործ, ըստ ТАСС-ի՝ լրագրողներին հայտնել են Ռուսաստանի Դաշնության տարածաշրջանի քննչական կոմիտեից։

«2025 թվականի մարտի 4-ի կեսօրին Զավյալովո գյուղում գտնվող սրճարանից դուրս գալու պահին հրազենից սպանվել է Զավյալովսկի շրջանի վարչակազմի ղեկավարը։ Այս փաստի հիման վրա ՌԴ Քննչական կոմիտեի Ալթայի երկրամասի քննչական վարչության Բլագովեշչենսկի միջշրջանային քննչական վարչությունում հարուցվել է քրեական գործ՝ ՌԴ Քրեական օրենսգրքի 105-րդ հոդվածի 1-ին մասով (սպանություն) նախատեսված հանցագործության հատկանիշներով»,- ասվում է հաղորդագրությունում։

Գերատեսչությունը հավելել է, որ հանցագործություն կատարելու կասկածանքով Զավյալովո գյուղում ձերբակալվել է տեղի բնակիչը։

«Ալթայի երկրամասի դատախազ Անտոն Գերմանը հսկողության տակ է դրել հանգամանքների պարզումը և քրեական գործի հետաքննության ընթացքը։ Նրա խնդրանքով դեպքի վայրում աշխատում է տարածքային դատախազը»,- հայտնել է շրջանային դատախազի օգնական Մարիա Անտոշկինան։

Օնիշչենկոն ծնվել է 1973 թվականի օգոստոսի 8-ին։ Նա ընտրվել է Ալթայի երկրամասի Զավյալովսկի շրջանի ղեկավարի պաշտոնում 2022 թվականի հոկտեմբերին։ Մինչ այս Օնիշչենկոն աշխատել է ներքին գործերի գերատեսչություններում։