Վրաստանում ձյան տեղումների հետևանքով որոշ գնացքների երթուղիներ չեղարկվել են

Վրաստանում առատ ձյունը խնդիրներ է ստեղծել երկրի արևմուտքում երկաթուղային երթևեկության համար, ինչի հետանքով հանգստյան օրերի ծառայությունները չեղարկվել են: Այս մասին հայտնում է Sputnik գործակալության վրացական ծառայությունը՝ հղում կատարելով «Վրացական երկաթուղիների» հաղորդագրությանը:

Մասնավորապես, նշվում է, որ ձյան տեղումների պատճառով որոշում է կայացվել չեղարկել փետրվարի 22-ին և 23-ին նախատեսված չվերթերը Օզուրգեթի-Թբիլիսի, Բաթումի-Օզուրգետի, Ռիոնի-Քութայիսի-Ռիոնի երթուղիներով: 

Հաղորդվում է, որ մնացած չվերթները կիրականացվեն նախատեսվածի համաձայն։ 

Նշվում է, որ Վրաստանում փետրվարի 23-25-ը երկրի արևմտյան շրջաններում սպասվում է եղանակի վատթարացում։ Օդերեւութաբանների կանխատեսումների համաձայն՝ ծովում հավանական է 4-6 բալ ուժգնությամբ փոթորիկ, իսկ Կոլխիդյան հարթավայրում օդի ջերմաստիճանը գիշերը կնվազի մինչև -4, -6 աստիճան։

Վրաստանի լեռնային և բարձրլեռնային շրջաններում հնարավոր է մառախուղ, տեղ-տեղ հնարավոր է բուք և ձնահյուսեր, ճանապարհներին՝ մերկասառույց, էլեկտրահաղորդման գծերի մերկասառույց։