Ասադն անձամբ է որոշում կայացրել հրաժարական տալ․ Պեսկով

Սիրիայի նախկին նախագահ Բաշար ալ Ասադն անձամբ է որոշել հեռանալ իր պաշտոնից։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը։

Կրեմլի ներկայացուցչին հարցրել են, թե ինչ դեր է խաղացել Ռուսաստանի Դաշնությունը Ասադի Մոսկվա տեղափոխվելու հարցում և արդյոք մասնակցել է նրա հեռանալուն։

«Պետության ղեկավարի պարտականությունների կատարման գործընթացից նահանջելը Ասադի անձնական որոշումն էր», - արձագանքել է Պեսկովը։

Ավելի վաղ Կրեմլի աղբյուրը հայտնել էր, որ Ասադն ու նրա ընտանիքի անդամները ժամանել են Մոսկվա։ Ռուսաստանը, հումանիտար նկատառումներից ելնելով, նրանց ապաստան է տրամադրել։

Հիշեցնենք՝ նոյեմբերի 27-ին «Ջեբհաթ ան Նուսրա»-ի զինյալները խախտել են հրադադարի մասին համաձայնագիրը և գրոհել Սիրիայի Հալեպ և Իդլիբ Նահանգների վրա: Սիրիական բանակին աջակցում են Ռուսաստանի օդատիեզերական ուժերը՝ հարվածներ հասցնելով ահաբեկիչների տեխնիկային, կառավարման կետերին, պահեստներին և հրետանային դիրքերին։ Նոյեմբերի 30-ին հայտնի դարձավ, որ թուրքամետ արմատական խմբավորումները գիշերվա ընթացքում գրեթե ամբողջությամբ գրավել են Սիրիայի Հալեպ քաղաքը, իսկ Հալեպի գլխավոր հյուպատոսությունն ու Հայկական մարդասիրական առաքելությունը տարհանվել են։ Դեկտեմբերի 5-ի երեկոյան հայտնի դարձավ, որ հակակառավարական ուժերը գրավել են Սիրիայի կենտրոնական Համա քաղաքը, դեկտեմբերի 7-ի երեկոյան՝ Հոմսը, իսկ դեկտեմբերի 8-ի առավոտյան՝ մայրաքաղաք Դամասկոսը: