Կոբախիձեն հայտարարել է Սաակաշվիլիին ներում շնորհելու անիմաստության մասին

Ներկայիս նախագահ Սալոմե Զուրաբիշվիլիի կողմից Վրաստանի նախկին նախագահ Միխեիլ Սաակաշվիլիի հնարավոր ներումը գործնական նշանակություն չի ունենա ընթացիկ քրեական գործերի պատճառով։ Այս մասին հայտարարել է Վրաստանի վարչապետ Իրակլի Կոբախիձեն, փոխանցում է ТАСС-ը։

«Նույնիսկ եթե Սալոմե Զուրաբիշվիլին ներում շնորհի Միխեիլ Սաակաշվիլիին, նա դեռ կմնա նախնական կալանքի տակ։ Բացի այդ, նրա դեմ հարուցված այլ գործեր կան։ Ըստ այդմ, Սալոմե Զուրաբիշվիլիի կողմից Միխեիլ Սաակաշվիլիին ներում շնորհելը գործնական նշանակություն չունի»,- ասել է Կոբախիձեն «Իմեդի» հեռուստաալիքին տված հարցազրույցում։

Ինչպես պարզաբանել է Կոբախիձեն, Զուրաբիշվիլին, ում լիազորությունների ժամկետը լրանում է տարեվերջին, չի կարող Միխեիլ Սաակաշվիլիին բանտից ազատել։ 

Հիշեցնենք․ Սաակաշվիլին, ով այժմ Ուկրաինայի քաղաքացի է, լքել է Վրաստանը 2013 թվականին, որից հետո երկրում նրա դեմ հարուցվել է 4 քրեական գործ, որոնցից երկուսը հեռակա դատապարտվել են երեք տարվա և լրացուցիչ վեց տարվա ազատազրկման։ Քննվում են 2007 թվականի նոյեմբերի 7-ի ընդդիմության հանրահավաքը ցրելու, «Իմեդի» հեռուստաընկերության գրասենյակի ոչնչացման և մոտ 9 միլիոն լարիի (ավելի քան 3,3 միլիոն դոլար) պետական ​​միջոցների յուրացման գործերը։ 2021 թվականի հոկտեմբերին Սաակաշվիլին գաղտնի ժամանեց Վրաստան, սակայն բերման ենթարկվեց, որից հետո նրան մեղադրանք առաջադրվեց սահմանի ապօրինի հատման մեջ։ 2022 թվականի մայիսին առողջական վիճակի վատթարացման պատճառով քաղաքական գործիչը տեղափոխվել է Թբիլիսիի «Վիվամեդ» մասնավոր կլինիկա, որտեղ էլ գտնվում է մինչ այժմ։