Թուրքիայում արտակարգ վայրէջք է կատարել հնդկական ավիաընկերության ինքնաթիռը

Հնդկական ավիաընկերության ինքնաթիռը չնախատեսված վայրէջք է կատարել Թուրքիայի արևելքում գտնվող Էրզրումի օդանավակայանում՝ օդանավում իբր տեղադրված ռումբի մասին հաղորդագրությունից հետո: Այս մասին TRT Haber հեռուստաալիքի եթերում հայտնել է Էրզրումի նահանգապետ Մուսթաֆա Չիֆթչին:

«Ինքնաթիռը վայրէջք է կատարել Էրզրումի օդանավակայանում՝ իբր տեղադրված ռումբի մասին հաղորդագրություն ստանալուց հետո, ի սկզբանե այն ուղարկվել է Տրապիզոն, բայց այնտեղ ինտենսիվ երթևեկություն է։ Ինքնաթիռը նախատեսված է 600 մարդու համար, այժմ ունի 242 ուղևոր: Բոլոր ուղևորներն իջեցվել են ինքնաթիռից, մասնագետներն ամբողջությամբ ուսումնասիրում են ինքնաթիռը», - հայտնել է Չիֆթչին։

Նրա խոսքով՝ եթե սպառնալիքը չհաստատվի, Հնդկաստանից Գերմանիա մեկնող ինքնաթիռը կշարունակի թռիչքը։ Այժմ Էրզրումի օդանավակայանը փակ է թռիչքների համար։

Դատելով հեռուստաալիքների հեռարձակումից՝ խոսքը Vistara ավիաընկերության ինքնաթիռի մասին է։