Սանկտ Պետերբուրգում Փաշինյանի հետ քննարկել ենք «անկլավների» հարցը. Ալիև

Սանկտ Պետերբուրգում ԱՊՀ ոչ պաշտոնական գագաթնաժողովի ժամանակ Ադրբեջանի նախագահ Իլհամ Ալիևը  Նիկոլ Փաշինյանի հետ «ոտքի վրա» քննարկել է անկլավների թեման: Այս մասին Ալիևը հայտարարել է ադրբեջանական ԶԼՄ–ներին տված հարցազրույցում:

«Այդ հարցը քննարկվում է նաև ՀՀ վարչապետի հետ իմ շփումների ընթացքում, այդ թվում՝ Սանկտ Պետերբուրգում «ոտքի վրա» զրույցի ժամանակ ես բարձրացրել եմ այդ հարցը։ Այն նաև դելիմիտացիայի հանձնաժողովի օրակարգում է։ Պետք է ասեմ նաև, որ սահմանազատման հանձնաժողովի հերթական հանդիպումը նախատեսված է այս ամիս»,- հայտարարել է Ալիևը։

Նշենք, որ Նիկոլ Փաշինյանը 2023–ի դեկտեմբերի 25–ին մասնակցել է Եվրասիական տնտեսական բարձրագույն խորհրդի նիստին, իսկ դեկտեմբերի 26-ին՝ ԱՊՀ ոչ պաշտոնական գագաթնաժողովին: Այնտեղ նա «ոտքի վրա» հանդիպել է Իլհամ Ալիևի հետ։

Հիշեցնենք, որ նոյեմբերի 24-ին քաղաքացիների հարցերին ուղիղ եթերում ի պատասխան ՀՀ վարչապետ Նիկոլ Փաշինայնը նշել էր, որ Տավուշի մարզում անկլավների հարցը կա։ Նա ընդգծել էր` երբ ասվում է Հայաստանի 29.800 ք/կմ տարածք, դրա մեջ չեն մտնում այն էքսկլավներ/անկլավները, որոնք Խորհրդային Միության ժամանակ պատկանել են Ադրբեջանին։ ՀՀ 29.800 ք/կմ–ի մեջ մտնում է Արծվաշենը, որը էքսկլավ է` շրջափակված խորհրդային Ադրբեջանի տարածքով։