Փաշինյանի կաբինետը Քաղաքաշինության կոմիտեի նախագահ է փնտրում

ՀՀ վարչապետի աշխատակազմը Քաղաքաշինության կոմիտեի նախագահ է փնտրում։ Համապատասխան հայտարարությունը հրապարակվել է կառավարության պաշտոնական կայքում։ Ղեկավարի պաշտոնում թեկնածուների կադրային բանկը համալրելու նպատակով վարչապետի աշխատակազմն ինքնակենսագրություններ է հավաքագրում։

«Պահանջվում է պատշաճ կրթություն, ծրագրերի կառավարման, ղեկավարման, վերահսկողության կամ համակարգման փորձ և հմտություններ»,- նշված է հայտարարության մեջ։

Պահանջվող որակավորումների վերաբերյալ այլ մանրամասներ նշված չեն։ Հետաքրքրված թեկնածուները, ինքնակենսագրությունից բացի, պետք է նաև մոտիվացիոն նամակ ուղարկեն։ Վերջնաժամկետը 2024 թվականի հունվարի 9-ն է։

Հայտարարության մեջ նշված է, որ հարցազրույցներից հետո ընտրված երեք թեկնածուների տվյալները կներկայացվեն վարչապետին՝ կառավարության հաստատմանը ներկայացնելու համար։

Հիշեցնենք, որ Քաղաքաշինության կոմիտեի նախագահի պաշտոնը թափուր է մնացել հունվարի 4-ից, երբ պաշտոնից հեռացվեց Արմեն Ղուլարյանը։ Նա և Լոռու մարզպետ Արամ Խաչատրյանը պաշտոնանկ արվեցին վարչապետի՝ Լոռու մարզ կատարած աշխատանքային այցից հետո, երբ դպրոցի նորակառույց մարզադահլիճում բազմաթիվ թերություններ էին հայտնաբերվել։