կարևոր
1171 դիտում, 3 ամիս առաջ - 2023-12-27 13:14
Քաղաքական

Բաքվի բանտերում պահվող գերիներին ազատ արձակելու ուղղությամբ իշխանությունների քայլերը բավարար չեն

Բաքվի բանտերում պահվող գերիներին ազատ արձակելու ուղղությամբ իշխանությունների քայլերը բավարար չեն

Ադրբեջանի կողմից ապօրինաբար ձերբակալված Արցախի ռազմաքաղաքական ղեկավարության խնդիրը շարունակում է մնալ մտահոգ քաղաքացիների ուշադրության կենտրոնում։

Օրեր առաջ ՀՅԴ «Նիկոլ Աղբալյան» ուսանողական միության կողմից Երևանում իրազեկման ակցիա էր անցկացվել և քաղաքի տարբեր հատվածներում փակվել էին Արցախի ռազմաքաղաքական ղեկավարության ներկայացուցիչների լուսանկարները, սակայն ժամեր անց դրանք հեռացվել էին։

Ուսանողական միությունն այս կապակցությամբ հայտարարություն էր տարածել՝ նշելով, որ Արցախի ղեկավարների նկարով պաստառները հաշված ժամեր անց հեռացնելը ՔՊ-ական իշխանության թուլամորթության, թրքապաշտության, Ալիևից ունեցած վախերի մասին ևս մեկ փաստ է։

Oragir.News-ի հետ զրույցում ՀՅԴ «Նիկոլ Աղբալյան» ուսանողական միության վարչության ներկայացուցիչ Տարոն Ղազարյանը նշեց, որ ակցիան եղել է բարոյաքաղաքական՝ ինչպես ադրբեջանական իշխանությունների կողմից ապօրինաբար ձերբակալված և Բաքվի բանտերում պահվող Արցախի ռազմաքաղաքական ղեկավարության, այնպես էլ մյուս գերիների և նրանց հարազատների համար։

«Քանի որ առջևում Ամանոր է, իշխանություններն այդ ուղղությամբ գերթանկարժեք չհիմնավորված ծախսեր են իրականացնում, Հայաստանում ունենք 100 հազարից ավել բռնի տեղահանված հայրենակիցներ, որոնց սոցիալական կարիքները նորմալ չեն լուծվել, իրենց հայրենի հողում պահելու համար արժանավայել պայմաններ չեն ստեղծվել՝ ակցիայի հիմնական մեսիջները սրանք են եղել»,- ասաց նա։

Տարոն Ղազարյանն ուշադրություն հրավիրեց այն բանին, որ իշխանությունների կողմից պատշաճ քայլեր չեն ձեռնարկվել գերիների և Արցախի ռազմաքաղաքական ղեկավարության վերադարձն ապահովելու ուղղությամբ։ Նա համաձայնեց մեր դիտարկման հետ, որ նախաձեռնությունն ավելի շատ ուղղված է եղել ներհայաստանյան լսարանին՝ հիմնականում ՀՀ իշխանություններին։

Անդրադառնալով իշխանությունների կողմից տարածվող այն քարոզչական թեզերին, թե ՀՀ-ում նման ակցիաների անցկացումն անիմաստ է, քանի որ խնդրի լուծումը կախված չէ հայկական կողմից՝ ՀՅԴ «Նիկոլ Աղբալյան» ուսանողական միության վարչության ներկայացուցիչ ընդգծեց, որ խնդիրների լուծումն այսօր Հայաստանից կախված չէ հենց գործող իշխանությունների ձեռամբ և մեղավորությամբ։ Նա հիշեցրեց, որ 30 տարի շարունակ ՀՀ-ն եղել Արցախի Հանրապետության և ժողովրդի անվտանգության երաշխավորը ու շատ հաջող իրականացրել է իր իրավական, քաղաքական և բարոյական պարտավորությունները։

Տարոն Ղազարյանը հավելեց, որ նման ձևակերպումներով ներկայիս իշխանությունները ձգտում են արդարացնել իրենց դավաճանական քայլերն ու գործողությունները, որոնց հետևանքով երկիրը գտնվում է նման ծանր իրավիճակում։