Ադրբեջանը բացահայտորեն ցեղասպան վարքագիծ է ցուցադրում. Լիլիթ Գալստյանը` ԵԱՀԿ ԽՎ նիստում

Ադրբեջանը բացահայտորեն ցեղասպանություն է ցուցադրում և ստիպում Լեռնային Ղարաբաղի բնիկ բնակչությանը լքել իրենց տները։ Այս մասին, այսօր՝ հուլիսի 4-ին, ԵԱՀԿ ԽՎ տարեկան լիագումար նիստի ժամանակ ասաց «Հայաստան» խմբակցության պատգամավոր Լիլիթ Գալստյանը։

Մինչ Լեռնային Ղարաբաղի ողբերգությունը շարունակվում է առանց միջազգային հանրության կողմից որևէ պատժամիջոցի, Ադրբեջանն ու Թուրքիան առաջ են մղում իրենց պանթյուրքիստական ​​գաղափարը՝ միջազգային իրավունքի լիակատար անտեսմամբ, նշել է պատգամավորը։

«Ցավոք սրտի, դժվար պահպանել լավատեսությունը, երբ հենց երեկ Ալիևը կրկնեց, որ Ադրբեջանը պատրաստվում է իրականացնել, այսպես կոչված, «Վրեժ-3» նախագիծը։ Ուշադրություն դարձրեք, այստեղ հիմնական բառը վրեժն է։ Դժվար է լավատեսություն պահպանել, երբ ադրբեջանական պատվիրակության ղեկավարը փորձում է մոլորության մեջ գցել վեհաժողովը։ Այս իրավիճակը հիշեցնում է 20-րդ դարասկզբի Հայոց ցեղասպանության ողբերգական հիշողությունները»,- շեշտեց Լիլիթ Գալստյանը։

Հայ պատգամավորը կոչ է արել ԵԱՀԿ ԽՎ-ին ավելի կոշտ գործողություններ ձեռնարկել Ադրբեջանի դեմ։

«Ձեր հանդուրժողականությունը կանաչ լույս կծառայի Ադրբեջանին՝ շարունակելու էթնիկական զտումների քաղաքականությունը, հին քրիստոնեական քաղաքակրթության արտաքսումն իր հայրենիքից։ Թույլ մի տվեք, որ Լեռնային Ղարաբաղի հայության ճակատագիրը զոհաբերվի աշխարհաքաղաքական շահերին։ Ագրեսիայով ուղեկցվող խաղաղության ջանքերը չեն կարող կայունություն ապահովել։ Ադրբեջանի ցեղասպան պահվածքը վկայում է այն մասին, որ Արցախի ժողովրդի ինքնորոշման իրավունքն այլընտրանք չունի»,- ընդգծեց Լիլիթ Գալստյանը։