ՌԴ ԱԳՆ-ն բարձր է գնահատել Հայաստանի և Ադրբեջանի միջև խաղաղության պայմանագրի շուրջ ուղիղ քննարկումները

Ռուսաստանը կշարունակի նպաստել Ադրբեջանի և Հայաստանի միջև հարաբերությունների կարգավորմանը. հայտարարել է ՌԴ փոխարտգործնախարար Միխայիլ Գալուզինը։

«Ռուսական կողմը կշարունակի ջանքերը եռակողմ հայտարարություններին լիովին համապատասխան՝ օգնելու լուծել հայ-ադրբեջանական հարաբերությունների կարգավորման հարցերի ողջ շրջանակը, ներառյալ, իհարկե, առաջընթացը խաղաղության պայմանագրի ստորագրման ուղղությամբ»,- ասել է Գալուզինը ուրբաթ օրը Россия-24 հեռուստաալիքին տված հարցազրույցում։

Նա բնական և տրամաբանական գործընթաց է համարել այն, որ Բաքուն և Երևանն ուղղակիորեն քննարկում են խաղաղության պայմանագրի տեքստը՝ նշելով, որ «Ռուսաստանի նախագահի, Ադրբեջանի նախագահի և Հայաստանի վարչապետի միջև  չորս համատեղ հայտարարություններով եռակողմ համաձայնագրերը մնում են անվիճելի ճանապարհային քարտեզ հայ-ադրբեջանական կարգավորման համար»։

Պատասխանելով Կովկասում ԱՄՆ քաղաքականությանը վերաբերող հարցին՝ ՌԴ փոխարտգործնախարարն ասաց, որ Վաշինգտոնը «ամենուր փորձում է հասնել նույն բանին՝ մի կողմից դուրս մղել Ռուսաստանին, մյուս կողմից՝  նեոգաղութատիրական ոճով ենթարկել անկախ պետություններին, որոնք Ռուսաստանի գործընկերներն ու դաշնակիցներն են՝ միջամտելու մեր գործընկերությանը և դաշինքին մեր ընկերների և հարևանների հետ»:

Գալուզինը հավելել է, որ Ռուսաստանը դեմ չէ, որ այլ երկրները նպաստեն Ադրբեջանի և Հայաստանի միջև հարաբերությունների կարգավորմանը, «բայց ոչ խոսքով, այլ գործով»։