Թալանել են Երևանի քննչական վարչության նախկին պետ Մհեր Վարդանյանի ավտոմեքենան

Ապրիլի 13-ին գողության դեպք  է տեղի ունեցել  Երեւանում: Այդ օրը ժամը 20:20-ի սահմաններում Երեւանի բնակիչ Մհեր Վարդանյանը նկատել է, որ Երվանդ Քոչար փողոցում գործող «SAS» սուպերմարկետի մոտ կայանված, իրեն պատկանող Porsche մակնիշի ավտոմեքենայի դուռը բացել են եւ այնտեղից կատարել գողություն: Այս մասին հայտնում է SHAMSHYAN.com-ը։

Գողության մասին Մ. Վարդանյանը ոստիկանություն է դիմել 1 օր անց եւ հայտնել, որ ավտոմեքենայի սրահից գողացել են պայուսակ, որի մեջ եղել է իրեն պատկանող «Չեզեթ 75Բ նյու էդիշն» տեսակի ատրճանակ՝ լիցքավորված 8 փամփուշտներով, 2 հատ անձնագիր, զենքի թույլտվության կտրոններ, բանկային քարտեր, զինգրքույկ եւ գումար: Գումարն էլ եղել է մոտ 6500 ԱՄՆ դոլար:

Դեպքի փաստով Հայաստանի Քննչական կոմիետի Երեւան քաղաքի քննչական վարչության Կենտրոն եւ Նորք Մարաշ վարչական շրջանների քննչական բաժնում նախաձեռնվել է քրեական վարույթ:

Գ. Շամշյանի տեղեկություններով՝ Մ. Վարդանյանը նախկինում աշխատել է Հայաստանի Քննչական կոմիտեի Երեւան քաղաքի քննչական վարչության պետ: