Տեխասի հայկական եկեղեցին ճանաչվել է 2022 թ. ԱՄՆ-ի լավագույն շինություն

Հեղինակավոր World-Architects կայքը հրապարակել է 2022 թ. ԱՄՆ-ի լավագույն շինությունների ցանկը, որում առաջին հորիզոնականում է հայտնվել Տեխասում գտնվող Սբ. Սարգիս հայկական եկեղեցին:

«Ճարտարապետ Դեվիդ Հոթսոնի կողմից նախագծված եկեղեցին գնում է դարերի խորքը և տարածվում է հազարավոր մղոններ ամբողջ աշխարհով` իրեն կապելով հայկական ավանդույթների և հայ ժողովրդի հետ»,  - գրում է կայքը:

Եկեղեցին օծվել է 2022 թ. ապրիլի 23-ին, իսկ առաջին կիրակնօրյա աղոթքը կատարվել է ապրիլի 24-ին` Հայոց ցեղասպանության օրը: «Փոքր եկեղեցին, համեմատած այլ մեգանախագծերի, հեռու է Հայաստանից ավելի քան 7000 մղոնով, բայց եկեղեցու համայնքի շատ անդամներ այն հայերի ժառանգներն են, ովքեր փախել էին երկրից Առաջին աշխարհամարտի ժամանակ», - նշվում է կայքում:

Եկեղեցին կառուցվել է Երևանից մի քանի կմ հեռու գտնվող և 7-րդ դարում կառուցված Սբ. Հռիփսիմե եկեղեցու կրկնօրինակով: Եկեղեցու վրա պատկերված կենաց ծառը` նվիրված Հայոց ցեղասպանության զեհերին, բաղակացած է 1.5 մլն շրջանաձև պատկերներից, որոնցից յուրաքանչյուրը եզակի է, ինչպես մեկ դար առաջ խլված կյանքերը:

Հոթսոնը զգացված էր, որ իր նախագծած շինությունը նման բարձր կոչման է արժանացել. «Ինձ համար մեծ պատիվ է, որ հայկական եկեղեցին նման կոչման է արժանացել, այն ցանկանում եմ կիսել ամբողջ թիմի, նախագծի օգտին քվեարկողների և հայկական համայնքի այն ներկայացուցիչների հետ, ում համար սա մեծ նշանակություն ունի»: