կարևոր
3916 դիտում, 1 տարի առաջ - 2022-10-29 14:00
Քաղաքական

Սոչիում պատրաստ եմ ստորագրել փաստաթուղթ, ընդունել, որ ռուս խաղաղապահների ժամկետը ԼՂ-ում երկարեցվի 10-20 տարով. Փաշինյան

Սոչիում պատրաստ եմ ստորագրել փաստաթուղթ, ընդունել, որ ռուս խաղաղապահների ժամկետը ԼՂ-ում երկարեցվի 10-20 տարով. Փաշինյան

Հայ հանրության շրջանում փորձ են անում տպավորություն ստեղծել, թե ԼՂ հարցով կա ռուսական առաջարկ, որը դրական է Հայաստանի համար ու կա արևմտյան առաջարկ, որը բացասական է Հայաստանի համար: Այս մասին այսօր՝ հոկտեմբերի 29-ին, «Քաղաքացիական պայմանագիր» կուսակցության համաժողովի ժամանակ հայտարարեց Նիկոլ Փաշինյանը:

«Ասում են՝ Հայաստանի կառավարությունը մերժում է Ռուսաստանի ծրագիրն ու ընդունում է արևմտյան ծրագիրը: Կներեք, սա իրականության հետ ոչ մի կապ չունի։ Այն, որ կա ռուսական ու արևմյան ընկալում՝ ճիշտ է, իսկ Հայաստանը ռուսական ընկալման հետ համաձայնվել է ու սկզբունքային պայմանավորվածություն ձեռք է բերել 2021 թվականի հունվարին։ Այդ պայմանավորվածությունների ակյունաքարային դրույթը եղել է, որ Ռուսաստանը ԼՂ-ի եւ Հայաստանի անվտանգության երաշխավորն է: Սա շատ կարևոր նրբություն է, ու մենք պայմանավորվել ենք այդ սցենարի ու պլանի շուրջ», - ասաց Փաշինյանը:

Նա նշեց՝ սեպտեմբերին Հայաստանը հենց առաջին հանդիպման ժամանակ համաձայնություն է տվել ռուսական պլանի իրագործմանը. «Ես ասում եմ, որ Սոչիում կայանալիք հանդիպմանը պատրաստ եմ պաշտոնապես ընդունել, եթե անհրաժեշտ է եռակողմ հայտարարության ֆորմատով ստորագրել այդ 15 կետերի հիման վրա համաձայնության հասնելու փաստաթուղթը, այսինքն՝ այդ փաստաթուղթն ընդունել հիմք Հայաստանի ու Ադրբեջանի միջև խաղաղության պայմանագրի ստորագրման համար»,- ասաց Փաշինյանը:

Նա հայտարարեց՝ պատրաստ է Սոչիում ստորագրել փաստաթուղթն ու ընդունել, որ ռուս խաղաղապահների ներկայությունը Լեռնային Ղարաբաղում երկարեցվի 10-20 տարով. «Ես պատրաստ եմ այդ թուղթը ստորագրել: Ես առաջարկում եմ, որ ՌԴ նախագահն այդ առաջարկով հանդես գա, եթե պետք է՝ ես հանդես կգամ այդ առաջարկով, բայց Ռուսաստանը պիտի պաշտպանի այդ առաջարկը, որովհետև ես չեմ կարող որոշել, որ ՌԴ խաղաղապահները այնտեղ պետք է մնան ինչ-որ ժամկետով։ Դա եռակողմ թուղթ է ու եթե մենք ու Ռուսաստանը համաձայնվենք, կլինենք մեծամասնություն», - ընդգծեց նա: