Էրիկ Ալեքսանյանի ձերբակալությունը իշխանությունների պատասխանն է, քանի որ աչքի է ընկել իշխանությունների հասցեին սուր քննադատություններով․ փաստաբան

Այս պահին գտնվում եմ ՀՀ ԱԱԾ քննչական դեպարտամենտում, ստանձնել եմ իմ ընկեր, փաստաբան ԷՐԻԿ ԱԼԵՔՍԱՆՅԱՆԻ շահերի պաշտպանությունը, գրում է փաստաբան Գայանե Պապոյանը։

«Թեև նախազգուշացվել եմ նախաքննական գաղտնիքը չհրապարակելու մասին, սակայն ցանկանում ենք բոլորին տեղեկացնել, որ նախաձեռնված քրեական վարույթը կաշառքի հետ ԲԱՑԱՐՁԱԿ կապ չունի։

Էրիկ Ալեքսանյանը չի ընդունել իրեն առաջադրված մեղադրանքը։ Վստահ ենք, որ այս ամենը իշխանությունների պատասխանն է Էրիկ Ալեքսանյանին, քանի որ վերջինս մշտապես աչքի է ընկել սուր քննադատություններով , իրականացրել է պաշտպանություն հնչեղ քաղաքական գործերով, այդ թվում՝ «մարտի 1-ի» գործով, Արմեն Չարչյանի, Աղվան Հովսեփյանի, Վազգեն Մանուկյանի, Առուշ Առուշանյանի, Արմեն Գևորգյանի և այլոց գործերով։

Էրիկ Ալեքսանյանն այս ամենին վերաբերվում է ժպիտով»։

Ավելի վաղ հայտնել էինք, որ փաստաբան Էրիկ Ալեքսանյանը ձերբակալվել է։ Հայտնի էր դարձել, որ Երևանի ընդհանուր իրավասության առաջին ատյանի դատարանի դատավոր Արուսյակ Ալեքսանյանի նկատմամբ քրեական հետապնդում հարուցելու և կալանավորելու վերաբերյալ համաձայնություն տալու միջնորդություն է ներկայացվել Բարձրագույն դատական խորհուրդ։