Իրավիճակը մի պահ լարվեց նաեւ Բաղրամյան պողոտայում. այստեղ է Լեւոն Քոչարյանը

Երեւանի Բաղրամյան պողոտայով անցնող ընդդիմության անհնազանդության երթի ժամանակ ինչ-որ պահի իրավիճակը լարվեց: Երթի մասնակիցները որոշեցին ամբողջությամբ փակել պողոտան, ինչից հետո ոստիկանները փակեցին նրանց ճանապարհը եւ թույլ չէին տալիս, որ ակցիայի մասնակիցներին առաջ գնան։

Նշենք, որ այստեղ են «Հայաստան» խմբակցության պատգամավոր Վահե Հակոբյանը, ՀՀ երկրորդ նախագահի կրտսեր որդին՝ Լևոն Քոչարյանը։

Վերջինս լրագրողներին հայտնեց, որ երբ իրենք իմացան, որ Հաղթանակի կամրջի մոտ իրենց մյուս երթի մասնակիցների նկատմամբ բռնություն են կիրառել, իրենք որոշեցին փակել պողոտան ամբողջությամբ: Բայց հետո տեղեկացան, որ իրենց ընկերների երթը շարունակվում է, իրենք էլ բացեցին պողոտայի մի մասը:

Նշենք, որ այս պահին ընդդիմադիր  շարժումը Ֆրանսիայի հրապարակից 4 ուղղություններով երթ է իրականացնում:

Հիշեցնենք, որ նախօրեին ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հայտարարել էր, որ մայիսի 6-ին անհնազանդության ակցիաները սկսում են ժամը 12-ին: Հավաքվելու են Ֆրանսիայի հրապարակում եւ չորս ուղղություններով պարալիզացնելու են ողջ Երևանի երթևեկությունը։

«Հասել ենք մեր ծրագրի ավարտական փուլին, մեր մնացած հայրենակիցներին ևս ավելացնեւմ ենք, ողջ իրադրությունը լիարժեք վերցնում ենք մեր տրամադրության տակ և հեռացնում ենք այս չարիքի կառավարությանը»,– հայտարարել էր նա։

Ավելի վաղ  հայտնել էինք, որ մայիսի 2-ից խաղաղ անհնազանդության ակցիաներ են սկսվել Երեւանում, ամեն օր փակվում են մի շարք փողոցներ: Մայիսի 2-ից Երևանի Ֆրանսիայի հրապարակում հանրահավաքներ են իրականացվում։