Գվատեմալայում հրաբուխ է ակտիվացել․ բնակիչներին տարհանում են

Գվատեմալայում Ֆուեգո հրաբխի մոտ գտնվող գյուղերից տասնյակ ընտանիքներ՝ 150 մարդ, տարհանվել են, հաղորդում է ՏԱՍՍ-ը՝ հղում անելով բնական աղետների հետեւանքների դեմ պայքարի ազգային համակարգող կենտրոնին։

Ֆուեգոն ակտիվացել է վերջին շաբաթվա ընթացքում։ Սեյսմոլոգիայի, հրաբխագիտության, օդերեւութաբանության եւ հիդրոլոգիայի ազգային ինստիտուտի փորձագետների կարծիքով՝ մոտ ապագայում ժայթքումը կարող է կտրուկ ուժեղանալ։

Մարտի 7-ին տեղի են ունեցել պիրոկլաստիկ հոսքերի մի քանի հզոր ժայթքումներ, որոնք ուղեկցվել են լավայի արտահոսքով։

Ֆուեգոն գտնվում է երկրի կենտրոնական մասում, բարձրությունը 3,7 կմ է։ Այն հանրապետության ամենաակտիվ հրաբուխներից է։ 2018թ․ դրա ժայթքման զոհ է դարձել 300-400 մարդ։