Էրդողանն «անընդունելի է» որակել ՌԴ-ի կողմից Դոնեցկի և Լուգանսկի անկախության ճանաչումը

Մենք հստակ ուրվագծել ենք Դոնբասի ճգնաժամի կարգավորման մեր ծրագրերը։ Այն բանից հետո, երբ Ռուսաստանը ընդունեց ԴԺՀ-ի և ԼԺՀ-ի անկախությունը, մեր ԱԳՆ-ն հայտարարեց, որ Մոսկվայի այս որոշումը հակասում է մինսկյան պայմանավորվածություններին և բացահայտ խախտում է Ուկրաինայի քաղաքական միասնությունը, ինքնիշխանությունը և տարածքային ամբողջականությունը։ Այս մասին լրագրողներին ասել է Թուրքիայի նախագահ Ռեջեփ Թայիփ Էրդողանը։

Նա նշել է, որ Թուրքիան անընդունելի է համարում Ռուսաստանի այդ որոշումը։

«Մենք կրկնում ենք մեր կոչը կողմերին՝ ողջախոհության և միջազգային իրավունքը հարգելու համար։ Եթե Ուկրաինայում պատերազմ սկսվի, մենք կարող ենք ինչ-որ կերպ դա դիտարկել որպես Սևծովյան տարածաշրջանի ապակայունացում»,- ընդգծել է Էրդողանը։

Հարցին, թե արդյո՞ք Թուրքիան անհանգստացած է երկրին սպառնացող նոր տիպի սպառնալիքներից, նա պատասխանել է, որ երկիրը նույն տարածաշրջանում է։

«Մենք նույնպես սևծովյան երկիր ենք։ Ուստի անհրաժեշտ է ստեղծել միջոցառումների բազմաթիվ փաթեթներ։ Եվ մենք արդեն ձեռնարկում ենք այս նախազգուշական միջոցները։ Մենք չենք կարող հրաժարվել մեզ վստահված պարտականություններից՝ լինելով սևծովյան երկիր»,- ընդգծել է Թուրքիայի նախագահը։

Ռեջեփ Թայիփ Էրդողանը հայտնել է նաև, որ Թուրքիան կարող է մասնակցել Ուկրաինայի, Գերմանիայի և ՄԱԿ-ի Անվտանգության խորհրդի անդամների համատեղ գագաթնաժողովին։

«Եթե նման առաջարկ լինի, մենք, իհարկե, կմասնակցենք։ Ես արդեն խոսել եմ այդ մասին։ Զելենսկիի առաջարկը դրական մոտեցում է խնդրի լուծմանը։ Եթե այն ընդունվի ինչպես ՄԱԿ-ի Անվտանգության խորհրդի անդամների, այնպես էլ այլ երկրների կողմից, մենք նույնպես կմասնակցենք դրան»,- ասել է նա։