Ռուս-ամերիկյան բանակցությունները սպառազինությունների և ուկրաինական խնդրի շուրջ կանցկացվեն հունվարի 10-ին

ԱՄՆ-ի և Ռուսաստանի ներկայացուցիչների միջև սպառազինությունների վերահսկման և ուկրաինական հիմնախնդրի շուրջ բանակցությունները տեղի կունենան հունվարի 10-ին.  լրագրողներին հայտնել է ԱՄՆ Սպիտակ տան Ազգային անվտանգության խորհրդի  ներկայացուցիչը։

«Երբ մենք նստենք բանակցությունների սեղանի շուրջը, Ռուսաստանը կարող է հայտնել իր մտահոգությունները, մենք կքննարկենք նաև մեր մտահոգությունները՝ կապված Ռուսաստանի Դաշնության գործունեության հետ»,- ասել է նա։

«Կլինեն ոլորտներ, որտեղ մենք կարող ենք առաջընթաց գրանցել, և ոլորտներ, որտեղ մենք համաձայն չենք լինի: Սա է դիվանագիտության էությունը»,- հավելել է ամերիկացի պաշտոնյան:

Նրա խոսքով՝ Ուկրաինայի վերաբերյալ որոշումներ չեն ընդունվի առանց նրա մասնակցության։

Բացի դրանից՝ պաշտոնյան հայտնել է, որ հունվարի 12-ին նախատեսված է Ռուսաստան-ՆԱՏՕ խորհրդի, իսկ հունվարի 13-ին՝ ավելի լայն տարածաշրջանային հանդիպում, որին պետք է մասնակցեն Մոսկվան, Վաշինգտոնը և եվրոպական մի շարք երկրներ։